لا تقول ما يمدي لأ في وقت

صبحكم مساكم الله بخير .... على حسب وقت قراءتك

حصل موقف بين زيد وعبيد ودار بينهم حوار جميل يقول زيد: ....... (ما تجي نشوف )
عبيد : السلام عليكم حيلا زيد
زيد : هلا وعليكم السلام زارتنا البركة .. شلونك وينك يا القاطع لا تمر الدوانيه ولا تسأل
عبيد : عذرني والله على الغيبة بس والله لا تلومني لاهي بالعبادة تدري الدنيا رمضان الحين وقلت بعد بنفس الوقت ما أبي أثقل عليك وأنت بعد تبي تستغل وقتك برمضان ..
زيد : إي خير إن شاء الله
عبيد : ليش يبا عسى ما شر .. قول سمعني شلون رمضان وياك هالسنة
زيد : يا معود اسكت عني هالسنة والله كلش مو شي
عبيد : يااا شلون جم ختمه وصلت
زيد : أي ختمه يا معود صل على النبي يا معود والله نوم طول النهار لي الفطور وبعد الفطور دوانيه وطلعات وبليل تلفزيون ....
عبيد : عيل اكيد الفجر عباده ..
زيد : لا قيام ليل!! يا معود أقولك خايرها هالسنة ((على فكره : خايرها كلمة كويتية تعني : أن الأمور ليست على ما يرام ))
زيد : والله مو ملتز لا بختمه ولا على التراويح ولا حتى الفروض في المسجد
عبيد : أف والله الحالة كسيفه تكسر الخاطر زين شناوي تسوي الحين
زيد : والله إن شاء الله إن شاء الله رمضان الياي بشد حييل عدل
عبيد : لا والله!! لا ويقولها بثقه ...بشد حييلي عدل .. يا معود هذا حجي بليس اترك عنك
زيد : عيل شسوي
عبيد : والله انا اقول غزرها نوم لي آخر الشهر ورمضان الياي شد حيلك ... يعني شتسوي
زيد : أنت قاعد تقزرها علي
عبيد : لا بس أنت الله يهداك تبط الجبد
زيد : أي ما في وقت ما يمدي طار الشهر
عبيد : أكيد طار الشهر عيل حسبالك بينطرك طال عمرك لين تصحا من النوم
لا يا حبيبي هذي فرصه ما تتكرر إلا مرة كل سنه والربحان إلي يستغلها
المهم الحين لا تقول ما يمدي لأ في وقت
ما تدري لعل الله يغفرلك في هالعشر الأواخر إذا اجتهدت فيهم
وبعدين لا تنسى حديث الني صلى الله عليه وسلم : (( رغم انفه .. من أدرك رمضان ولم يغفر له ))
والله يا زيد والله الخاسر ثم الخاسر إلي ما يستفيد من رمضان
زيد : يلا على ايدك ولا شفايدك أنت ولا بس شاطر ضغاط من مساع
عبيد : زين عيل اسمع هذا برنامج صغيرون امش عليه حق العشر الأواخر والله يكتب إلي فيه الخير والحسنة تجر الحسنة
زيد : هات سمعني
عبيد : أول شيء 1- الصلاة الصلاة الفرائض أهم شيء وأحب الأعمال إلى الله الصلاة على وقتها
2_ السنن الرواتب 12 ركعة باليوم يبني الله لك بيت في الجنة
3_ قراءة 3 أجزاء باليوم 3×10=30 هذي ختمه
4_ الالتزام بالتراويح والقيام مع الإمام كاملة
5_ الدعاء الدعاء أكثر منه واستغل أوقات الإجابة مثل ( بين الأذان والإقامة – عند الفطر – ساعة الإجابة يوم الجمعة )) ادع الله أن يغفر لك ما فات ويحسن لك ما هو آت وكذلك لا تنسى أن يجعلك الله من عتقاءه من النار فهذا شهر العتق
زيد : اوكي يلا قوم روح بيتكم خلني أشوف شغلي و جزاك الله خير
عبيد : طرده يلا يبا يلا فمان الله

أنا : الحوار من مخيلتي لان زيد وعبيد تنقال عند الكويتين كنايه عن أي شخص والظاهر إني متأثر بمسلسل التنديل الحوار شوي كويتي قديم على جديد
سلام