الخميس، 2 يوليو 2009

طلب اجازة

منوعات

أتقدم بإجازة إلي مديري الذي هو قارئي ,,,,

مشاغل الدنيا ... كثرت ... والجو حرارته صعدت ...ففي هذه الأحوال لا املك إلا أن أتقدم بطلب إجازة
والسفر بعيد عن هذه الشمس و الجو الحارق .. والغبار الخانق .. ولكني وقبل أن أسافر لابد لي أن أثير بعض المشاكل قبل هروبي ...
فهذه مجموعه منوعات من المشاكل قبل الإجازة :)





*مايكل جاكسون .....
وصلني خبر وفاة ((ملك الراب )) كما قيل في الإذاعة .. ولم أدهش ... فالرثى = ( الرجل + الانثى ) كبير وشي
طبيعي انه بموت ... ليس شي جديد .. ولكن ما أضحكني ... بعض المقابلات مع بعض الناس على الإذاعة
لماذا أضحكني ؟؟ حسنا سأقول ...
سأل احد الشباب الكويتي .. ما شعورك عن سماع خبر وفاة ملك الراب ؟ ؟
قال : بنرة شماتة ... والله إحنا مضايقين انا والربع بالدوانية وايد زعلانين عليه ... :) كلكجي الكويتي ..
ومقابله أخرى مع بنت لبنانية .. رقيقه ..
قالت: والله أنا كتيير مضايئا وزعلانا على مايكل لان ما في حفله إلا ونسمع في صوته ... وشي محزن إن توفى !!!
هذا ما دعاني إلى الانفجار بالضحك ... حتى إن شفت واحد بالسيارة إلي يمي يضحك علي .. أتوقع قال هذا جن وقعد
بس انا رقعت السالفة .. حطيت التلفون على إذني ...هههه

الشاهد بعد ما سمعت الأخت اللبنانية وقلت ... لا حرام والله بس لا تضيقين خلقج يا بعدي ... لان في حديث فرح فيه الصحابة وايد ...حديث النبي صلى الله علية وسلم (( يحشر المرء مع من يحب يوم القيامة )) حيث ان الصحابه كانوا يتأملون بصحبة النبي الكريم و يخافون ان لا يدركونه في الجنة .. ولكنهم فرحوا عند سماع هذا الحديث ..

*مشكلة فعلا بس لا يزعلوون مني ربعنا بدول الخليج ... لان الحق ما ينزل منه
ايي يا الكويت .... راحت أيام العز
ال20 +10 وربعهم قاعدين يعزون الدينار وقرب يومه ... وراح نعزية باسخف جنازة عرفها التاريخ
الدينار القوي سيستبدل بالخليجي مادري كرم... الهزيل على أساس الوحدة العربية الزائفة ..

لا يخفى عليكم ان طال عمرهم .. يناقشون موضوع توحيد العملة .. بالخليج العربي .. وتسمى ب(( خليجي \ كرم)) ولكن هناك متمردين .. وهم الامارات وعمان ... والسبب في التمرد هو .. الامارات تطالب بالبنك المركزي ..والسعودية ترفض .النتيجة انسحاب الامارات ..عمان ترفض ... السبب .. ان الريال العماني قوي ,
من حقهم .. بس الدينار شنو يقول اذا الريال العماني قوي .. الدينار كمال اجسام الي جانب عملات الخليج ..
بس شنقول ... حسبي الله ونعم الوكيل عليك يا خليجي ..
شفنا في تجربت غيرنا ... الاتحاد الاوربي وحد عملته .. وصارت يورو ولكن بريطانية رفضت لان العقل يقول لا يمكن تساوي الجنية الإسترليني القوي بباقي العملات الضعيفه ...
والدينار شفيه يحضي ليش ما يشيل عمره ليش مو مثل العالم ...
يعني انا شنو اسوي ارووح البنك ابي استلم راتبي ... آخذ معاي خيشه عيش احط فيها الفلوس بدال البووك

وعوار القلب ...
نواب المجلس ...يطرحون الثقه فيمن لا ثقة فيهم ...إذ هم تناسوا هم الشعب وهم المواطنين في احد ما تهمه فلوسه ما اعتقد ...ولكن المسرحية .. مستمرة و المشاهد يضحك بسذاجة على هذه المسرحية التافه ...بعنوان (( مجلس الأمه))
آخ يا قلبي الأخبار بتسبب لي جلطة .... اصرخ بأعلى صوووت تفاااااااهة قسم بالله تفاهة لعب على الذقون

خلاص خلاص انا برووح اريح وهدي اعصابي بلندن

والي مثل حالتي وارتفع ضغطه أدعوووكم لشرب كأس من الشاي في الاجولرود الشاي البريطاني الأصلي
ياتني تذكرة ببلاش ... على أساس إني محرم ... أقول لأ طبعا موافق ... الضوء الأخضر شغال بالصيف لأي اقتراح سفر .... حيث إني سأكون متواجد في الاجول رود واستمتع بشرب الشاي البريطاني .. الي يبي يلاقيني هناك و يعرفوني صرخوا بأعلى صوت بالاجول رود ... الفنان وصدقوني ماراح ارد عليك ....فشله :)
بس دور بالنك نييم .. البلوتوث اذا لقيت الفنان .. يعني انا موجود .... حياااكم مو شغل هلاقة ... أسافر وأحط نكي كويتي ... يعني شوفوني :)
18\7 تاريخ السفرة خلونا نشووفكم
وان شاء الله لي رديت .. اكتب لكم ما شاهدت هناك من عجايب وغرائب

*وعندي لكم هداية









من الحين على شان لاحد يقوول وين الصووغه وتوك ياي من السفر ... اوكي واضحين من البداية :)هههه

الهدية الاولى
http://www.youtube.com/watch?v=MPIhbURKGi4

هذا مقعط فيديو ... لمنافس هيفاء وهبي ... اسمه ابراهيم الفقي شووفوا .. تكفوون
شي مضحك
اعجبتني كلمات الاغنية ... ........ (( اطعني حته حته وارمني لكل اوطه انا كنت احب واحد ودلوأتي صاروا سته))








شركة الاخت مو مره تحب سته شركاء
اكمل صراخي .... تفااااااهههه
راح اغير صراخي الى غناء
................. ما اتفهك,,,, اتفه واسخف من خيال ---- يا هيفاء




*اما هذي الهدية الثانية لكم
هالمرة غير
هذا فلم يتلكم عن الماسوونية


http://www.youtube.com/watch?v=nvSLHFO7puQ
هذا الفلم يقولك باختصار إن أنت عايش في مسرح ....
وهذا يذكرني بغنية طارق العلي (( الدنيا مسرح بس مسرح كبير ........ لم افهم ؟؟ ))
ركز ياطارق كلامك صح .... قال شكسبير (( الدنيا مسرح كبير وكلنا مجرد ممثلون في هذا المسرح ))
واعجبني تصوير الدكتور بدر الماص في احدى الدورات التي حضرتها له
قال : الدنيا تتكون من ثلاث مقومات .. لاعبين يلعوب في ملعب الحياة .. وحكام يحكمون ويصدرون القراراة وجمهور .. هم على خلاف .. منهم من لا فائده منه الا الصراخ .. ومنهم من يكتفي بالمشاهده والتذمر .. الخ
الشاهد ...
هذا الفلم ليس كل ما فيه صحيح 100% ولكن ادع لك المجال لإستنتاج الصح من الخطأ .. وما هو في حدود العقل وما هو الذي يفوق انا بالنسبة لتي اسرت في سجن هذا الفلم لمدة اسبوع ما بين تفكير فيه ومشاهده وحديث عنه في كل مجلس








في الرابط ستشاهد الحلقة الاولى بالترجمة .. والباقي عليك انت حلقة وراء الثانية لي ان تصل الى الختام 50

عمل جبار للغاية اتمنى لكم قضاء وقت ممتع بالصيف شكرا ..... ارجوا ان توافقوا على اجازتي,,
متشوق لسماع ردردكم و حل مشاكلي .. والقضايا المتناولة بشكر سريع .... أتمنى احد يقولي كلامك غلط ومعلوماتك ضعيفة ... لان الدينار ماراح يتبدل ... بهذه اللحظة لن اغضب منه ابدا بل سأقبل جبينه فرحا بكلامه

شكرا

هناك 24 تعليقًا:

غير معرف يقول...

حسب مروري السريع على المواضيع..

عندي ملاحظة صغيرة .. معلومات فيلم القادمون ليست موثوقة 100%.. فدير بالك إذا بتكمل تشوف السلسلة..

بارك الله فيك.. وحفظك ورعاك

سعد المحطب يقول...

تروح وترد بالسلامة حجي :)

وإحنا خلنا عايشين بالبراد والغيوم ..

وعلى سالفة مايكل جاكسون ..
تدري شنو اللي يضحك؟

لما ناس يقولون الله يرحمه ويغمد روحه الجنة ..

شكرا لك على بوست الوداع المؤقت :)

جنون الكويت يقول...

اهم شي تاخذ خيشة عيش ..........والله مت من الضحك..........
وانشالله تروح وترد بالسلامه يالفنان

علي يقول...

هههههه طلعت داهية والله مب سهل يافنان :D


تروح وترد سالم

الفنان يقول...

غير معرف ::

حاضر واوامر ساعتك منفذه امرك سيدييييي


بس خل نعرف انت منو ... :)

وكلامك صحيح المعلومات مو كلها صحيحه بس هذا ما ينفي .. ان الفلم عجيب وفيه حقيئق قوية ...

بارك الله فيك وحفظك ورعاك ووداك الجنه بعد


==================================

اجتماعي :

الله يسلمك يا بعد عمري
اصلا ما سوت علي على شان اطلع الفيزا ... تملطشت .. لاني انا راعي مشاكل

ولا اهم قوالنينهم واضحه
بس الحمد لله انا بالنهاية فزت عليهم .. مشيت كلامي على السفاره
هههههه
عسى ما يصيدوني .. ويكنسلون الفيزا



وعلى سالفه مايكل جاكسون ... ههههههههه
والله ضحكتني .. مو لأن في ناس تقول انه صار مسلم .. بس ترى ما حج ولا صام
يعني بالاسم صار مسلم ...

حبيب نشووفكم بعد الصيف

==================================

جنون الكويت :

امممم سبحان الله
شدراج اني مريت على مدونتج

بس ماعلقت لاني كنت مستعجل قريت الموضوع وما علقت عليه ... بس ان شاء الله لي مرورو ثاني اكيد


وعلى طاري الخيشة ههههههه
خاص ولا همج اكثر من الخيااش المرات الجاية
والله يسلمج وارد لكم سالم ؛) ترى ما في صواغي ها انا قلت تبون عندكم الفيديوات

==================================

علي الملا :

:) خخخخخ مشكووور

الله يسلمك تعال خلنا نشوفك هناك ؛)

احساس انثى يقول...

يسعد مسائكـ.~

تروح وترجع بالسلامهـ..

لاوصيكـ على الهدايا :)

،،

مايكل اممم مانقول الا الله يرحمه ولا !! :)

//

تحياتي لكـ

نمووول يقول...

تروح وترجع بالسلامة ان شاء الله بس حسافة راح يطوفة البدي الي بينزل بعد ايام على الكويت مو مشكلة تعوضها بالصيف الياي


اما مايكل فما قول غير آآآووو

حلوة كرم لوووووول اي بيصيرون كرماء على افانا ويوزعون الفلوس .. انا اقول وحدو العملة ولا ما وحدوها بتضل فلوسنا تروح برى الكويت

شكرا على الموضوع الجميل
وبالسلامةان شاء الله

noor يقول...

تروح و ترد بالسلامه ..

دكتورنا قالنا ان ماكو خليجي لان اغلب دول الخليج انسحبت :)

اخرهم الامارات انسحبت عشان المقر مو فيها .. مو سبب مقنع للانسحاب ..

مشكور ع الهدايا .. عجيبه ..

الفنان تدونتك ابداع x ابداع

موفق ..

الغدوف يقول...

بوستك ممتع

إن شاء الله تنبسط بالإجازة والجواللندني , الحمد لله ما ندور عليه , في عسير والسودة إللي نبي , بس الله يسامحكم يالكويتيين بالذات مسوين زحمه حيل والواحد ما يحط رجله بالطريق إلا على راس سائح خليجي وكويتي خصوصا , تارسين كل مكان في أبها , بس بالعافيه عليكم استانسوا كثر ما تبون , ما نقول إلا ومرحبا ألف من قلوبنا لمن أتى


ومايكل جاكسون خله على جنب وهو حي وهو ميت مسوي زوبعة في العالم !!

هداياك حلوة , شكرا لك

وترجع بالسلامة

بنت أحمد يقول...

سنفتقد وجودك وقلمك ومرورك على مدوناتنا

خووووووووش منوعات يالفنان

أنا معك في منوعات بس سالفة الدينار والريال ماادري ,, من الأصل شعندهم على سالفة توحيد العملات ؟؟ أحس احنا كذا حلوين وفاهمين بعض !! <<<< لعدم تعمقي في الموضوع وجهة نظري لاتؤخذ بعين الاعتبار

المهم

لاتطول الغيبة ولا تنسانا وطمنا عليك

وتذكر ان احنا بانتظارك أول ماترجع قولنا

رحلة سعيدة موفقه

الفنان يقول...

احساس انثى :

يسعد ايامج .... تسلمين شكرا

الله يسلمج

الهدايا ..... :) قلنا الصووغة بالبوست
بس ولا يهمج نييب لكم صووغه من هناك



مايكل ..... الله يرجمه ...

اقول الله يرحمنا كلنا برحمته ... والله احنا الي محتاجين رحمة الله ...
الله يرحم والدين الجميع

شكرا لمرورج الانيق

==================================

نموووووول :


الله يسلمك
البردي خخخخخخخخخخخ بردي مغبر .. لا لا
خلاص بكنسل سفرتي

هههههه
تدري شلون يبا خل بردي للكويت لهل الكويت يستاهلون لانهم طيبين خخخخخ


خخخ ضحكتني سالفة كرم

والله انك صاج فلوسنا مو لنا
لغيرنا

بس ان شاء الله ما تتوحد العملة


عفوا والله يسلمك مشكوور الغالي وان شائء الله ما تحرمنا من مرورك .. في البوستات القادمة

=================================

noor :



نوووور ما ادراك ما نوور

والله اسف اسف اسف
لاني قلت لج بمر على مدونتج وما مريت ..اس ف والله نسيت انشغلت .. وما فتحت النت من زمان والله
بس هالمرة ان شاء الله بمر عليج وبقوول رايي
ارجو ان تقبلي اعتذاري


على راسي دكتوركم اذا كلامه صحيح
عجبتج الهديا .... تستاهلين اكثر

مرورج فوق الابداع ..
شكرا على المديح

===================================

الغدووف:

شكرا
اهلا وسهلا بمرورك
مشكووره وان شاء الله تنبسطين انتي كذلك
خخخخ
الكويتين بس بالصيف ينشافون في كل مكان بس المصرييين .. في كق وقت وفي اي مكان في العالم تلاقهم من كثرهم
وبعدين احنا الكويتين فقارة شويه
بس مسوين لوويه :)

والله واحنا بعد ما نقول الا يا الف مرحبا باهلنا السعودين


ما يكل جاكسون .. ما راح اخليه على جنب لانه صار برووحه على جنب وبالقبر

يسعدني ان اعجبتكي الهدية ..:)

الله يسلمج :)

===================================


بنت احمد :

عساكم ما تفقدون عزيز
والله عاد انا مقصر .. وايد بحقج انتي وزميلانتا المدونات ما امر عليهم من فتره لان الجو عندنا جهنمي ...الواحد ما يقدر يفكر حتى

يادووب... من بحر لي بحر


خوووووووووووووش مرورك يا بينت احمد على راسي

والله انا معاج بعد .. احنا جذي حلوين مع بعض
مو لازم توجيد عملة ...
واذا صج يفولون .. يبون الوحده العربية
انا اقوول خل نفرض قالنون توحيد اللغة العربية على كافه الدول
مو العملة وكلام فاضي

ان شاء الله ما انساكم وهل اجأ على نسيانكم

اوكي ان شاء الله .. بخبرييكم شو بشووف هونيك
بس مو بعد لندن على طوول لان في بعدها
رحلات اقوى

ان شاء الله اذا الله قدر ( ماليزيا وتايلند ))

~ ع ـذبـة الاطـبـاع ~ يقول...

اسلوب مشوق

يعطيك العافية اخوي :)

غيـــر يقول...

لووول
فيديو الفقي حده عجيــــب
:))


أضحك الله سنك .. و بالسلامــة .. استمتع
:)

ظلال الدَلْماء يقول...

تروح و ترد بالسلامة:),
مايكل جاكسون مو كبير وايد 50 بس!,
الدينار الكويتي عزاء حقيقي و فراقه مستحيل مستحيل:(,

يعطيك العافية:).

noor يقول...

الفنااااان :

ماكو داعي للاعتذار ياخوي ..عادي

موفق ..

maha يقول...

الفنان

مع اول مرر لي على المدونة

السلام عليكم ورحمة الله

اللي خلاني اعلق سالفة المحرم
يوبا ذليتونا على سالفة المحرم
والمشكله محفول ومكفول وتتعززون على شنو !!!!

دمت بحفظ الرحمن

الفنان يقول...

اولا اسف على التأخير للجميع

~ ع ـذبـة الاطـبـاع ~:

شكرا شكرا لن شاء الله نشوفكم مرة ثانية بعد



\\\\\\\\\\\\\\\\\\\\\\\\\\\\\\\\\\

غيـــر :

اهلا وسهلا حيا الله من زمان

اهم شي الفقي منافس هيفا


\\\\\\\\\\\\\\\\\\\\\\\\\\\\\\\\\\

ظلال الدَلْماء :

الله يسلمج شكرا

مايكل مو كبير لالا بعده بالابتدائي
:)

الريال مات وخلص كبير ولا صغير الموت ما يعرف احد ما في يمه ارحميني

انا اقصد ان مرده راح يمووت يعني اخر النشوار شنو كانوا يتوقعون انه بعمر

وبعدين اهو منقطع من فتره
هم يقولن انهم انصدموا اسم الله عليهم
هذا الي قاعد اسخر منه

:)


ايييي الدينار نتنفس الصعداء الله يستر


الله يعافيج اختي

\\\\\\\\\\\\\\\\\\\\\\\\\\\\\\\\\\

noor :

:)


\\\\\\\\\\\\\\\\\\\\\\\\\\\\\\\\\\\


maha :

ههههههههههه
وعليكم السلام

اول مرور قوي

خخخخخخ

اكيد نتعزز
مو انتوا المحتاجين
هههه لازم نتعزز


ولعلج عندي بوكت مني 100 دك ههههه
وغصب وافقت


دلعني اكثر .......هههههههههه

:)

اقصوصه يقول...

تروح وترد بالسلامه :)

الفنان يقول...

اقصوصه :
سوري على التأخير كنت مسافر وتني وصلت

الله يسلمج


شكرا للإهتمام

bu-saad يقول...

خووش فضفه
:)

غير معرف يقول...

|
|

منوعَات جميله وفكاهيَه ,,

الله يعطيك العافيَه ,,

دمت بود

|
|

عالية الثرايا يقول...

صراحه اول مره اقرأ في مدونتك

وما شاء الله ع مواضيعك كل واحد اقوى من الثاني هههههههه

من جد

ودي اتكلم عن هالموضوع يلي دخلت فيه تقريبا خمس قضايا هههه


بالنسبه لمايكل بصراحه انا من سمعت انه مسلم قلت يوم الله هداه قتلوه يمكن هههههه < طيبه وايد همها من قتله لما أسلم

بس الناس تعليقاتهم تحفه

قول لهم عن موتت الصحابي الفلاني عادي ما يتأثرون او احد العلماء يلي توفى من فتره بسيطه عادي ما صار شئ
بس قول لهم عن ممثل ولا فنان يتأثرون بسرعه

والله من جد شئ يقهر


,


اما لموضوع الفلوس بيخلونها عمله وحده وبيتحدون

يا رجال كلام فاضي انت قد سمعتهم اتحدوا ع شئ ؟!

حده يجتمعون وياكلون وخلص الموضوع

بس ربك كبير راح يجي اليوم ان شاء الله يلي يتحدون فيه بس اشخاص ثانين ان شاء الله مع تقدم الازمنه


,

بالنسبه لموضوعك عن الدكتور ابراهيم الفقي

ي الله هالدكتور تدري بمنوه يذكرني ؟

سليمان الجبيلان مثله مثله سبحان الله

طبعا هب ف الشكل

قصدي بالاسلوب والمزح

يضحكون الشخص مهما كانت نفسيته



ما شاء الله عليهم



واذ قرأت ردي ودي بأجابه

انت وش سالفتك مع السفر

كل يوم من ديره لديره

ترى من كثر الترحال تعلم التغرب عن بلده ^^

وغير شئ بعيد بعيد الشر طبعا

من تعود ع شئ مات عليه

اخاف تموت ف بلاد غريبه ما بها مسلمين ووتوهق ههههههههه


السموحه منك

الفنان يقول...

عالية الثريا

الساعه المباركة تواجدج في مدونتي

صحيح انا تكلمت في اكثر من موضوع
لانه يعتبر بوست منوعات وفرفشه عن غضب

والله ماادي مسلم ولا لأ بس الله يستر علينا


((بس الناس تعليقاتهم تحفه))
على راسي والله قرائي
وانتي معهاهم
وان شاء الله الناس فيهم خير

موضوع الفلوس والعملة اتمنى من كل قلبي يكون كلام فضاي
لاني ما ودي استلم راتبي بكييس بدال البوك


وموضوعي مع السفر انا اتحدى بن بطوطه
هههههههههه
والله انا رجل ادرس بره بلدي اصلا وما احب اقعد في مكاني وايد
احب اغير واشووف الناس واتعرف على الثقافات

وان اشاء الله اذا الله بيقبظ امانتي
ان شاءالله في مدينة الحبيب محمد صلى الله عليه وسلم

شكرا لزيارتكي وهذا ردي باختصار
بس ليش هذا البوست بذات الي علقتي عليه
وتعالي شرفني بالجديد

سلام

فيلسوف يقول...

كتاباتك مبدعه ما شاء الله عليك

خلني بس انتقل لموضوع واحد همني بشكل كبير إلا وهو توحيد العمله

طبعا انا اخالفك برأي بهذه النقطه

فأنا من اشد المؤيدين للوحده الخليجيه


لان فوائده كثير جدا برأي الشخصي المتواضع

قد تكون معلوماتي الاقتصاديه ليست بالكثيره ولكن الوحده النقديه

ليست فقط بفوائدها الاقتصاديه بل بالفوائد الاجتماعيه

وبخصوص سالفة تاخذ معاشك بخيشه لا تخاف ينزلون فئات اكبر من ال20 مو قضيه كبيره هذه
انت عارف طبعا ان السعوديه فيها ورقة 500 ريال وهذه تقريبا اكثر من 35 دينار يعني لا تخاف ممكن البوك يقل حجمه بعد شتبي اكثر ;)

اما بخصوص الريال العماني لا الريال العماني مو قوي بالعكس ضعيف

ومن مصلحه عمان ان تكون عملتها اضعف عمله في الخليج
تعرف ليش من اجل التصدير لان هذا يقلل تكلفة التصدير و تكثر الصادرات

وانت مثل ما تعرف عمان ليست دوله غنيه مثل باقي دول الخليج لذلك سيايتها النقديه بهذا الخصوص لها سبب

وعلى سالفة اليورو شوف اللحين كم وصل اليورو و كم كان حتى وصل انه يكون عمله رئيسيه وتكاد تنافس الدولار بالتعاملات التجاريه وهذا بدون دخول بريطانيا معاهم فمابالك بدخولها وغيرها اكيد بيرتفع اكثر


بس احنا حاجتنا الوحدويه تتعدى خيشة عيش احنا نحتاج لها بشكل كبيره خصوصا اننا في وقت لا وجود له للدويلات الصغيره

وان يد الله مع الجماعه

بأذن الله سوف اخصص موضوع بهذا الخصوص عندي

واتمنى منك تعليقك فيها